KollabiuM
DABAIAANA CHOLBONАхсынньы ый 26 күнэ!
⚜️ *Үтүө сарсыарданан!* ⚜️ 🔅 Бүгүн ахсынньы ый 26 күнэ, чэбэр күн. ✴️ Уһун суһуохтаах кыргыттар күннэрэ ✴️ Үгүс арҕааҥҥы дойдуларга - бэлэх күнэ ✴️ Арассыыйаҕа - Сухопутнай сэрии ПВО-тун күнэ ✴️ Эбириэйдэргэ Ханука – чүмэчи бырааһынньыга ✴️ Бу күн 1893 сыллаахха Кытай биллэр салайааччыта Мао Цзэдун уонна 1949 сыллаахха Сэбиэскэй Сойуус, Арассыыйа биллэр артыыһа, ырыаһыта Михаил Боярскай төрөөбүттэр. 🌏📰📌🔎 *СЭРГЭХ СОНУННАР:* 🔵 *Аан дойдуга:* 🔘 Бэҕэһээ сарсыарда Казахстан Актау куоратын аэропордун аттыгар сөмөлүөт урусхалланна. Азербайджан Баку куоратыттан Чечня Грознайыгар көтөн испит сөмөлүөт эмискэччи ыксаллаах быһыы-майгы биллэрбит уонна аара тохтуурга соруммут. Бастакы аэропорга туманнаах диэн Актауга утаарбыттар. Сөмөлүөт көтөн кэлэн бааҕар ордубут уматыгын бүтэрээри аэропорт тула иккитэ эргийбит, үсүһүн төхтүрүйэн эргийэн иһэн охтубут. 38 киһи суорума суолламмыта биллэр, 29 киһи тыыннаах хаалбыттар эрээри, үгүстэрэ ыарахан эчэйиилээхтэр. Билигин сөмөлүөт хара дьааһыгын көрөллөр-истэллэр, ол эрэн бастакы видео устууларынан да көрдөххө, сөмөлүөтү ЗРК ытыалаабытын курдук тэһэҕэстэрдээҕэ биллэр, баҕар ытыаламмытыттан сылтаан ыксаллаах быһыы-майгы биллэрбит буолуохтарын сөп диэн сабаҕалыыллар. 🔘 Испания уонна Алжир ыккардыгар Арассыыйа "Ursa Major" хараабыла тимирдэ. Кини Санкт-Петербург куораттан Владивостокка айаннаан испит, хараабылга баар 16 киһиттэн 14-дэ Картахена куоракка аҕалбыттар, икки киһи, ол иһигэр хапытаан ханна сүппүттэрэ биллибэт. Хараабыл тимирдиллибит биричиинэтин теракт диэн эттилэр. 🔘 Дональд Трамп бэрэсидьиэн солотугар киириэн да инниттэн дьону соһутар этиилэри саҥаран эрэр - бу сырыыга Панама ханаалын уонна Гренландияны Амыарыка састаабыгар киллэриэххэ диэн эттэ. Уопсайынан бэрэсидьиэн солотугар киирдэҕинэ Амыарыка экономикатын күүһүрдэр соруктаах, онуоха ити сирдэри ыллаҕына балаһыанньатын тупсарыа этэ диэн эттэ. Санаттахха, Панаама ханаалын Амыарыка оҥорбута, уонна сөптөөҕүн туһанан баран 90-с сылларга Панамаҕа төттөрү биэрбитэ. 🔵 *Арассыыйаҕа:* 🔘 Анал байыаннай дьайыы: 🔻 Арассыыйа өссө төгүл Харьков, Днепропетровскай, Кривой Рог куораттарыгар саһыарбыт байыаннай объектары ытыалаата - Х-101, "Искандер", "Калибр" ракеталарынан ытыалыыр. "Военная хроника" иһитиннэрэринэн, ытыалааһын сыалын-соругун сиппит. 🔻 Украина аармыйата Куурускай уобалас Льгов куоратын атаакалаата - ол түмүгэр үс дьон олорор дьиэтэ уонна киэргэнэр салон урусхалланнылар. Үс киһи суорума суолламмыт. 🔻 Алания Владикавказ куоратын эргиэн киинигэр беспилотник үлтүркэйэ кэлэн түһэн улахан баһаар таҕыста, биир дьахтар өлбүтэ, хас да киһи эчэйбитэ биллэр. Көтөн испит беспилотник - сөмөлүөт курдук дроннарга киирсэр, дэлби тэптэрэр эттиги тиэнэн испит үһү. 🔘Учууталлар үөрэнээччилэрэ таһыччы көрдөрүүлэрин иһин эбии төлөбүр - бириэмийэ ылар буолуохтара. Ол туһунан барыл бырайыагын бэлэмнии сылдьаллар, кэлэр сыл кулун тутар ыйыгар бэрэсидьиэҥҥэ көрдөрүөхтээхтэр. Бигэргэнэр түгэнигэр сокуон Үөрэҕирии ситимин сайдыытын тосхолугар киирэн 2040 сылга диэри үлэлиэҕэ диэн эттилэр. 🔘 Нуучча тылын туттуу аан дойду үрдүнэн 4 миэстэҕэ тигистэ. Саҥарар киһи ахсаанынан буолбакка - хас дойдуга уонна хас дойдулар икки ардыларыгар туттуллар тыл быһытыынан тарҕаныытын үөрэтэн баран ситигирдик түмүккэ кэллилэр. Бастакы - английскай, иккис - французскай, үһүс - испанскай тыл эбиттэр. Онтон саҥара дьон ахсаанынан 7 миэстэҕэ сылдьар эбит - нуучча тылынан 255 мөлүйүөн киһи кэпсэтэрэ биллэр. 🔘 Арассыыйаҕа кэрэ аҥар холуобунай буруйу оҥоруута бүтэһик 16 сылга саамай муҥутуур намыһах көрдөрүүлэннэ. Бастакы сыл аҥарыгар Арассыыйа үрдүнэн 64,6 тыһыынча эрэ дьахтар буруйга уорбаланан тутуллубут эбит, былырыын ити болдьоххо 110 тыһыынча этэ, ол иннинэ өссө элбэҕэ. 🔵 *Саха сиригэр:* 🔘 Бэҕэһээ Байконуртан көппүт "Союз 2.1б" ракетаҕа Саха сирин уонна Бүлүү улууһун гербэлэрэ ойууламмыттар эбит. Ол ойууланарын Бүлүүлэр тус бэйэлэрэ көрдөспүттэр үһү, быйыл Бүлүү улууһа 390 сылын бэлиэтээтэ. Билигин гербэ космос куйаарын тилийэ көтүө турдаҕа! 🔘 Нерюнгрига көһөн тиийэн үлэлиир быраастарга биир кэмнээх төлөбүр быһыытынан биир мөлүйүөн солкуобайы биэриэхтэрэ. Быраастар ол мөлүйүөнү ылар түгэннэригэр биэс сыл эҥкилэ суох үлэлиэхпит диэн эбээһэтэлистибэ баттаһыахтара диэн этэллэр. 🔘 Бүлүү улууһугар киһи өлүүлээх саахал таҕыста - федеральнай суолга Ипсум уонна Ланд Крузер харсыспыттар. Түөрт киһи суорума суолламмыт, ол иһигэр биир оҕо. Чопчу кимнээх өлбүттэрэ биллэ илик эрээри, сурах кырдьык буоллаҕына наһаа да абалаах, саҥа оҕоломмут эдэр ыаллар үһү, куораттааҕы роддомтан тахсан испиттэр үһү. 🔘 Бэҕэһээ Былатыан Ойуунускай түмэлигэр саҥа сүрэхтэммит Арассыыйа уонна Саха сирин суруйааччыларыгар удастабырыанньаларын үөрүүлээх быһыыга-майгыга туттарыы сиэрэ-туома буолан ааста. Сэттэ сип-сибиэһэй суруйааччыланныбыт! Тоҕо Арассыыйа уонна Саха сирин суруйааччылара буоллулар диэҥҥэ маннык быһаардылар: Саха сиригэр икки бөдөҥ Сойуус баар. Бэйэлэрэ тус-туспа уһун историялаахтар, киэн туттар норуот суруйааччылардаахтар. "Саха сирин суруйааччыларын Сойууһа" диэн Сойууспут Арассыыйа Суруйааччыларын Сойууһун сорҕото, филиала диэххэ сөп, ол аата Саха сирин суруйааччыларын Сойууһугар киирбит буоллаххына бүттүүн Арассыыйаҕа суруйааччы аатын ылаҕын диэн эттилэр. Олор быыстарыгар мин доҕотторум, алтыһар дьонум бааллар - түгэни туһанан истиҥ эҕэрдэбин тиэрдэбин! Чэ, кылгастык ситигирдик. Бу күҥҥүтүгэр ситиһиини! *_ДьолуКуус_* 08:10
